Дашкольнікі сур’ёзна падрыхтаваліся да конкурсу. Яны паказалі сваё майстэрства, арыгінальнасць і эмацыйнасць выканання, артыстычнасць, уменне інтанацыяй, жэстамі, мімікай перадаць сваё стаўленне да зместу верша.
Рыхтавацца да ўдзелу ў конкурсе дзецям дапамагалі не толькі выхавальнікі, але і бацькі.
Пры падвядзенні вынікаў журы прыйшлося нялёгка, бо кожны маленькі чытальнік вельмі стараўся. У выніку працяглай дыскусіі членаў камісіі пераможцы былі вызначаны.
У намінацыі “Самы эмацыянальны выканаўца” перамога дасталася выхаванцу групы № 9 Арсенію Дудаку, які вельмі кранальна і пранікнёна прачытаў верш Л. Геніюш “Зямля мая, ты кніга непрачытана…”.
Грамату “За выразнае і гучнае чытанне” атрымалі выхаванцы групы № 10 Маргарыта Ношчык за верш І. Муравейкі “Наш родны край” і Ліза Янюк за верш Я. Коласа “О, край родны, край прыгожы!”.
Артур Шкулепа (група № 11) стаў лепшым у намінацыі “Шчырасць выканання” за прыгожае расказванне верша Ю. Ціхана “Радзіма”.
У намінацыі “За выразнасць прамовы” перамагла Арына Кулікова з групы № 11, якая вельмі старанна прачытала верш Л. Воранавай “Мой родны куточак! Мая залацінка!”.
Абудзіць у душах слухачоў моцныя эмоцыі ўдалося Паліне Ярмолік (група № 10), якая выступіла з вершам Э. Агняцвет “Зямля з блакітнымі вачамі”.
Выхаванцы старэйшых груп падарылі гледачам музычныя нумары: песні і танец. Мерапрыемства атрымалася цёплым і душэўным, а пранікнёныя радкі вершаў абудзілі ў прысутных любоў да роднага краю і гонар за сваю Радзіму.
Аксана ВАРАБЕЙ, кіраўнік творчай групы ясляў-сада № 2 г. Свіслачы
